Ser llibre significa tener la capacidá de tomar decisiones ya actuar acordies cola propia voluntá, ensin ser coaccionaos o llindaos por factores esternos comu la opresión, la discriminación o la falta recursos. La llibertá ye un valor fundamental en cualquier sociedá democrática y considérase un drechu humanu universal. Ser llibre implica poder escoyer el nuesu propiu camín na vida, tener la capacidá d’espresanos llibremente, de buscar la verdá y de siguir nuesos mesmos convencimientos y creyencies. Tamién implica tener la responsabilidá de les nueses acciones y de respetar los drechos y llibertaes de los demás.
Fai unos díes el presidente asturianu tuvo la oportunidá de pidir al gobiernu d’España les competencies de la FEVE. Y nun lu fixu, la iniciativa parlamentaria de Foro tampocu tuvo’l sofitu del PP. Tamién está selmana, el presidente d’Euskadi pidió a Cantabria, Galicia ya Asturies que sofitarán l’AVE del Cantábricu. La iniciativa foi entamada pol lendakari Urkullu pa esti llunes que vien, día 13 de marzu, ye la cumbre en Ajuria Nea. Juan Cofiño, vicepresidente d’Asturies, enantes de sentase a falar na cumbre, de sópitu el miércoles 8 de marzu, saltó como un esguil asustáu, ensin escuitar a naide dixu que nun fai falta nengún AVE del Cantabricu nesti momentu (…). Ensin sentir el son de la gaita y la trikitixa diz:
“Asturias es tierra de tradiciones y de cultura ancestral, de tópicos y mantras más o menos fundamentados. Llevamos mucho tiempo hablando de proyectos de infraestructuras a la espera de finalización que han contribuido a alimentar una conciencia colectiva de marginación y aislamiento secular que afortunadamente no se corresponde ya con nuestra realidad»
¿Ya onde va esti acomplexáu de vicepresidente del gobiernu d’Adrián Barbón? ¿Onde va con esi cuelmu de complexos y facinas de “tópicos y mantras”? ¿Parez más un delegáu del Gobiernu de Pedro Sánchez n’Asturies que un miembru del Gobiernu del Principáu? ¿Cómo puede decíse que n’Asturies tan concluíes, “acabadas afortunadamente”, toles infraestructures? ¿Ú vive Cofiño, en Suiza? ¿Esti sociata pisa’l país, el terrén, la cai, les caleyes? ¿Fala colos paisanos y paisanes, cola xente del país?
(…) ¡ Mal anu lus que cuméu !
garbanzos, toucín ya fabas,
ya papas d’arroz cun zúquiri.
¡Nuestra Siñora mi valga! (…)
Esvilla d’una poesía de José María Flórez y González «Farruquín el de Buseco»
Pedro Sánchez, aplaude les decisiones d’Adrián Barbón y Juan Cofiño sumisos a les sos ordenes
Si Adrián Barbón va con esi discursu a la cumbre vasca, ye probable que-y rompan una botella de txacoli na tiesta, tamién ye más cenciellu que-y faigan tragar crudo un chuletón de vaca vieya, más podre que fresca. Asturies tien 1.300 años de hestoria, la entidá política más vieya de la península Ibérica; foi’l Reinu d’Asturies, cumbre d’Europa y cuna del lliberalismu. Una comunidá hestórica marxinada ya aislada por tous los gobiernos d’España del PSOE y tamién del PP. Ya entovía güei, falten infraestructures tan básiques pa vertebrar too’l país como ye l’autovía pol Surocidente (La Espina-Ponferrada) que de baldre, ensin peaxe, sía una salida rápida d’Asturies a la Meseta complementando l’autovía Huerna/Güerna; un AVE con anchu de vía internacional ya un AVE Cantábricu que sofite Euskadi, Cantabria, Asturies y Galicia que xuna’l corredor Atlanticu con Europa.
¿Pero que-y pasa realmente al gobiernu d’Adrián Barbón? La rempuesta ye nidia, nun quier meter presión al gobiernu de Pedro Sánchez porque ye tan cenciellu como dicir que ye del mesmu color, del PSOE. El gobiernu d’Asturies nun ye llibre, nin exerce la so poca autonomía política. El gobiernu de Barbón, ye dafechu sucursalista de Madrid ya asgaya de Pedro Sánchez. Y puntu. Barbón antroxáu d’autonomista independiente, fartase de decir que toma les decisiones n’Asturies y p’Asturies. Ye igual q’eche la bandera azul ya amariella pola so cabeza, nun ye creyible. Ye un gran llinguateru que nun diz una sola verdá. Ye lu q’hai .
D’otra miente, l’autonomía política cinca al grau de llibertá ya independencia qu’una entidá política tien pa gobernase a sigo mesma ensin interferencies esternes. Esto puede incluyir la capacidá de tomar decisiones sobro asuntos internos, establecer lleis, regulaciones y alministrar los sos propios recursos ensin depender en gran midida del gobiernu central o d’otres entidaes polítiques foriates. L’autonomía política pue ser otorgada a nivel rexonal, estatal o nacional, dependiendo del sistema políticu y les estructures de gobiernu arreyaes. Ya diximos q’Adrián Barbón nun ye llibre, nin siquiera independiente nes sos decisiones. El conceutu d’autonomía ta emparentáu col de soberanía, pero nun se confunde con él. L’autonomía pue dase por graos y a distintos niveles: nel conceyu, na rexón, nel estáu-miembru o entidá federativa, nel Estáu consideráu polo xeneral. La soberanía, sicasí, ye la potestá suprema, dientro del Estáu, de decidir n’última instancia de tolo que correspuende al bien públicu, col monopoliu de la coaccón física. Implica, poro, una superioridá con respeutu a otros poderes internos subordinaos.
L’unica manera de xestionar la FEVE ye qu’Asturies asuma les sos competencies, pero nun ye asina porque nun quier el PSOE nin tampocu’l PP que dixu que yera un «dislate». Ya amás el conseyeru Alejandro Calvo, dixu que enantes de mayu, diben traspasar la competencia de facer l’autovía de La Espina-Cerredo/Zarréu-Ponferrada al gobiernu d’España, ye decir pasa-y la pelota a otru. Mentantu que nun quieren competencies, las que tienen quieren pásales al Estáu central. Bien poca autoestima tien esti gobiernu o más bien que poques ganes de trabayar. Otru tantu, pasa cola Variante de Payares que’l PSOE empeñose en poner vía d’anchu ibéricu en vez d’internacional p’alta velocidá que ye la que tien toa Europa. Quiciabes ye’l momentu de sofitar xuntos, los asturianos, vascos, gallegos y cantabros la alta velocidá del AVE Cantábricu. Pero nun ye’l momentu según el vicepresidente del Principáu.
Nesti sen sucursalista, el protocolu alministrativu de FEVE firmáu por Barbón y Revilla nel Ministeriu de Tresportes de Madrid nun obliga a denguna de la partes nin siquiera a les sos firmantes. Tien más valor xurídicu una servilleta roblada por dos borrachos a les seis del riscar, comprometiendose a vender un xatu, que’l protocolu robláu pa la FEVE, que ye papel moyáu. De fai pocu, otru exemplu más ye’l Plan d’Ordenación d’Espacios Marítimos (POEM) nel que l’incompetente conseyeru d’Industria, Enrique Fernández, ya tamién l’incompetente sobre la Pesca, Alejandro Calvo. Nun fixieron un res, nin alegaciones nin oposición a tanta humillación al Mar Cantábricu, llantando milenta molinos eólicos marinos dende la ría del Eo a Xixón. ¿Porqué callarón como afogaos? Hai otru irresponsable más, que ye l’asturianu Hugo Morán, secretaríu d’Estáu de Mediu Ambiente (SEMA) d’España del Ministeriu pa la Transición Ecolóxica. Estos tres personaxes vendieron la mar Astúricu, la mar menor del océanu Atlanticu, a les élites estractives de les compañies elletriques. Ye más el conseyeru de Pesca d’Asturies, inda nun recibió a los pescadores asturianos y el POEM ya ta aprobáu definitivamente.
Núñez Feijóo «El Líder Menguante» del PP y Javier Fernández «El Mudu» (PSOE) señalen col dedazu al sabio Diego Canga «El Mesíes» como candidatu del PP
¿Cuála ye la solución a tanta llaceria? Que’l Pretor Canga «El Mesíes de Bruseles«, el señaláu pol dedazu del César Feijóo gobierne la provincia. Qué pena d’oportunidá perdía pol gallegu, pudo faer un congresu, unes primaries, ya que los militantes populares elixerán xente mozu de la cantera como Alvaro Queipo o Ivan de Santiago pa presidir el partíu. Pero l’egoismu del cabezaleru gallegu, del llíder menguante que solo tien una oportunidá pa echar a Pedro Sánchez nun va desperdíciala con Asturies y xugásela. Entos ye meyor escoyer un candidatu cola deda del pie gordu sentáu nun sofá de la cai Genova de Madrid y que foi asesor del sociata Javier Fernández «El mudu« nel conseyu de sabios. Asina que’l sabiondu de Canga ya tuvo la oportunidá de sacanos del furacu col mudu, anque ye indiferente porque’l PP tamién gobernó España y con Asturies namás que fixeron aprobios. Asina que si Asturies nun coye’l sartén pel mangu, nun somos quien a gobernanos por nós mesmos, entos nos gobernaran otros ayenos al país, ya como fasta agora, nun vamos tener enxámas un nuevu Estatutu d’Autonomía remocicáu ya gayasperu, nin competencies tresferíes, nin idioma, nin trenes de FEVE propios, nin na de na, comu fasta agora.
¡ Llibertá ensin mieu ya autovía pol Surocidente del país !
Les lluces de la ciudá
llíndienme cabo la mar
hasta la playa balera
onde’l carbón y l’arena
s’abracen una vez más.
El presente queda atrás,
presu del atapecer.
Pasen sieglos nun momentu,
y oigo, como nun llamentu,
la voz de la soledá.
Andarina, vienes tarde,
andarina, vienes tarde
vistida de sol y orbayu;
traes oro, y plata traes
a los fayeos de mayo.
Pente ñubes de robín
siento l’alma mineral,
trabayada en desengaños,
apagada como’l faro
d’una mar d’escoria gris.
Fatigáu del camín,
engurriáu pol bramar
d’innumerables hibiernos,
suaño los díes eternos,
espierto en nueches sin fin.
Andarina, vienes tarde,
andarina, vienes tarde
esllumando como’l rayu.
Risca l’alba d’esmeralda
pelos fayeos de mayo.
Pente calles de cristal
trona’l cantu del nordés
con palabres de poeta,
evocándome una idea,
tresportándome al llugar
onde ñaguo por volver,
ente los montes del sur,
onde vuela’l sitiu míu.
Onde too tien sentíu.
Onde soi quien quiero ser.
Andarina, vienes tarde,
andarina, vienes tarde
endolcada nel to cantu.
Yá relluma la rosada
pelos fayeos de mayo.
Cuántes promeses traxeras
con aquella primavera,
y marcharon col verano.
Llevóme la vida entera
regresar a la to vera
y a los fayeos de mayo.
Andarina, vienes tarde,
andarina, vienes tarde
vistida de sol y orbayu.
Yá ye tiempu que descanse
so los fayeos de mayo.
Andarina, vienes tarde,
andarina, vienes tarde
esllumando como’l rayu.
Risca l’alba d’esmeralda
pelos fayeos de mayo.
Hirviente resoplido 